uzyn sypat

[uzy:n]

  1. Gysga däl, ep-esli uzynlygy bar bolan.

    • Ol uzyn sakgalyny sypady. (B. Kerbabaýew, Aýgytly ädim)

    • Ýabyň iki tarapy-da uzyn gök dereklikdi. (B. Seýtäkow, Saýlanan eserler)

    • Sagat on iki bolmaga bäş minut galanda, men gyzyl papkamy goltuklap uzyn koridora çykdym. («Sowet edebiýaty» žurnaly)

    • Uzynyň akyly giç geler. (nakyl)

  2. seret uzak

    • Ol adam uzyn gije arkasy agyr bede ýükli görgüsini görüp gezenmişin. (N. Saryhanow, Kitap)

dili uzyn

seret dil2

  • Adamynyň öňünde eden etmişim ýokdur, onuň üçin dilim uzyndyr.

eli uzyn

Gurply, pully, mally, barly, zatly.

  • Eli uzyn adam.

ýaşy uzyn bolsun!

seret ýaş1

  • Toýuňyz gutly bola! Ogul ýaşy uzyn bolsun!