düýp at

  1. Bir zadyň aşak tarapy, aşagy, asty.

    • Ol demir ýoluň ýakasyndaky haýatyň düýbüne bukulyp, telegrafa golaýlady. (B. Kerbabaýew, Aýgytly ädim)

  2. Bir zadyň iç tarapynyň gutaran ýeri.

    • Syçan biraz salymdan soň agzy dar, düýbi giň bir hin ýasap çykypdyr. («Türkmen halk ertekiler ýygyndysy»)

    • Ol guýynyň düýbüni görmän, bedresindäki suwy döken-saçan edip, zordan ýabysyny suwa ýakdy. (A. Durdyýew, Saýlanan eserler)

  3. Tör.

    • Ol ikisi düýpde, artelden alan dokmalarynyň üstünde ýüzlerini galdyrman çitýärdiler. (A. Durdyýew, Saýlanan eserler)

  4. Ýerden şahalanyp gidýän ösümlikleriň, agaçlaryň kök sistemasy.

  5. Uly agaçlaryň we käbir ösümlikleriň bir sanysy.

    • Ýap boýlarynyň her ýerinde bir düýp tut, uzakdan bolsa hellewläp erik agaçlary görünýärdi. (B. Kerbabaýew, Aýsoltan)

    • Her düýp gowaçany ösdürip, kemala getirmek üçin, gör näçe azaplar çekilipdir. (B. Pürliýew, Ilkinji gün)

  6. Esasy, esas, özen.

    • Ol şeýle bir ýeserlik bilen mylaýymsyrady welin, komandir bu ýeserlikleriň düýp mazmunyny eýýäm aňlady we onuň ýüzünde ýigrenç alamatlary peýda boldy. (A. Gowşudow, Mähri-Wepa)

Ýazuw düzgüni

Menlik ýöňkemaniň -üm, -ümiz, senlik ýöňkemäniň -üň, -üňiz goşulmalary goşulýar. Çekimlisi uzyn aýdylýandygy üçin çekimli ses bilen başlanýan goşulma ýa-da -räk goşulmasy goşulanda, sözüň soňundaky dymyk çekimsiz degişli açyk çekimsizine öwrülýär.

Meselem düýp - düýbüm, düýbüň.

düýbüne ýetmek

Doly anygyny bilmek, meseläni hemme taraplaýyn aýdyňlaşdyrmak.

düýbüni tutmak

Esasyny goýmak, esaslandyrmak.

düýp tutmak

  1. Kök urmak.

  2. Mazaly ornaşmak, bütinleý ýerleşmek.

düýp almak

Kök urmak, gögermek.

  • Käbir düýp alan nahallary-da gyzgyn gün köýdürýärdi. («Sowet edebiýaty» žurnaly)

düýp işlik

Grammatik termin seret işlik

guýynyň düýbüne düşen ýaly bolmak

seret guýy


Duş gelýän formalary
  • düýbe
  • düýbedik
  • düýbi
  • düýbi-de
  • düýbüm
  • düýbün
  • düýbünde
  • düýbünden
  • düýbündenem
  • düýbündäki
  • düýbüne
  • düýbüni
  • düýbüniň
  • düýbüň
  • düýpde
  • düýpden
  • düýpdenmi
  • düýpdäki
  • düýpler
  • düýplerde
  • düýplerden
  • düýpleri
  • düýplerinde
  • düýplerinden
  • düýplerine
  • düýplerini
  • düýpleriniň
  • düýpleriň
  • düýpleýin
  • düýpli
  • düýplüdi
  • düýplügiň
  • düýplüligi
  • düýplüligini
  • düýplüliginiň
  • düýpsüz
  • düýpsüzlige