urmak ur‧mak işlik

Bir zady batly degrip agyra sezewar etmek, urgy täsirini ýetirmek, ýençmek.

• Ertesi irden Gurdy soraga alyp gitdiler. Ondan hiç bir soraga jogap ýokdy. Soň ony urmaga başladylar. (A. Gowşudow, Mähri-Wepa)

• Ol garagulak bilen başa-baş urşup, taýak bilen ony gaty urdy. («Mydam taýýar» gazeti)

• Sorap berenden, urup ber. (nakyl)

Bir zadyň üstünden kakmak, ýepbeşlemek.

• Naçalnik ýumrugyny stola uranda, bir ýany gyzyl, bir ýany ýaşyl galam towsup pola düşdi. (B. Kerbabaýew, Nebitdag)

Atyp oky degirmek, oky belli bir nyşana degirmek, atmak.

• Topragynda tozdur, gözünden urgun. (N. Pomma, Saýlanan eserler)

• Hawa, atyp bilýän, men tüpeň atyp guş hem urdum. (A. Durdyýew, Saýlanan eserler)

Göçme manyda Bir ýerden batly akmak (suwuklyk hakda).

• Fontan urýan.

Özüňi bir zadyň içine oklamak, batly girip gitmek.

• Tutulan adam böküp turdy-da, özüni gyrymsy agaçlaryň arasyna urdy. («Mydam taýýar» gazeti)

• Bular tiz tokaýa urup geçelgä baka gitdiler. (A. Gowşudow, Mähri-Wepa)

• Urşujylar güýzüň sowuk suwuna urdular. («Sowet Türkmenistany» gazeti)

Ýüklemek, basmak (ýük hakda).

• Maşyna iki tonna sazak urduk. Kim düýä, kim ýaba, hatda käbiri äwmezek öküze-de ýük urýardy. («Sowet Türkmenstanyň aýallary» žurnaly)

Tankyt etmek, kemçiligini aýtmak.

Kömekçi işlik funksiýasynda ysnyşyp gelýän isimleriniň manysy bilen baglanyşykly hereketi aňladýar.

• Gep urmak, sowuk urmak, azm urmak we ş. m.