örmek1 işlik

[ö:rmek]

  1. Ýörite çiş ýa-da maşyn arkaly ýüplükden, erişden we ş. m. önüm taýýarlamak.

    • Täze awtomatyň oturdylmagy jorap örmekde öndürjiligi ýokarlandyrmagy üpjün etdi. («Sowet Türkmenistany» gazeti)

  2. Saçy ýada käbir ösümlikleriň baldaklaryny biri-biriniň içinden geçirip birleşdirmek, işmek.

    • Mele saçyny örüp ýeňsede düýrläp, Rus aýaly otyr oglun gujaklap. («Sowet edebiýaty» žurnaly)

  3. Biri-biriniň üstünde tertipli goýup galdyrmak.

    • Eýýäm 10 müň sany kerpiç örüpdirler. («Sowet edebiýaty» žurnaly)

Ýazuw düzgüni

Ýöňkeme bilen üýtgände ikinji bogunda ü eşidilen ýerinde ýazylýar.

Meselem örmek - ördüm, ördüň, örüpdir.

örmek2 işlik

[ö:rmek]

  1. Gögerip başlamak, gögerip çykmak (ot hakda).

    • Bahar gelip ot örende, Gür tokaýda döwran sürer. («Mydam taýýar» gazeti)

    • Ýazyň şemaly ýaňy oren gök otlaryň, ýowşanlaryň ysy bilen ösýärdi. (B. Kerbabaýew, Aýgytly ädim)

  2. Tüý çykmak.

    • Onuň kellesine täze ören selçeň gara tüýleri, onuň ýüzüni öňküsinden biraz üýtgeden ýalydy. (A. Gowşudow, Köpetdagyň eteginde)

    • Ýalangaç eňegine bolsa iýmeşik gara gyllar örüpdir. (B. Kerbabaýew, Aýgytly ädim)

  3. Bedende herhili düwürtik peýda bolmak.

    • Çaga gyzamyk çykanda, bedenine örgün örýär.

  4. Köplük bolup aýaga galmak, birden turup gitmek.

    • Mugallym turanda, okuwçylar-da ördi. («Sowet edebiýaty» žurnaly)

    • Eziz laňňa galdy. Töweregindäkiler hem ördüler. (B. Kerbabaýew, Aýgytly ädim)

  5. Birlikde ukudan turmak, oýanmak; turmak.

    • Niçik? Sag-aman ördüňizmi? («Sowet edebiýaty» žurnaly)

Ýazuw düzgüni

Ýöňkeme bilen üýtgände ikinji bogunda ü eşidilen ýerinde ýazylýar.

Meselem örmek - ördüm, ördüň, örüpdir.

bir öýden örmek

Bir maşgalada ýaşamak, bir öýde ýaşamak durmuş gurmak.

  • Eger Aýna-da Artyk bilen bir öýden örse, onda onuň dünýäde kemi galmakjakdy. (B. Kerbabaýew, Aýgytly ädim)